اللوج لاين للسيناريو

مشاكل السيناريو (٣)

..

التعقيد والعائق

..

البوست اللي فات اتكلمنا على الحبكات الفرعية وذكرنا الرابط بينها وبين التيمة 

البوست ده هنتكلم على العلاقة بين الحبكات الفرعية والحبكة الرئيسية.

إيه الفرق بين العائق والتعقيد..

ندي مثال.. 

لو شخص راكب العربية بتاعته وماشي عاوز يلحق الطيارة وفجأة عربيته عطلت... او دخل في مطب وعربيته فيها حاجة اتكسرت.. واتعطل عن المشوار.. مع انه مشوار مهم ولازم يروحه.. 

.

طيب مثلا وهوا بيجري بالعربية.. حد اتصل بيه وقال له إن والدته تعبت جدا وودوها العناية المركزة.. 

..

إيه الفرق بين المثال الأول والتاني

المثال الأول هنا ده عائق.. ازمة إجبارية أو مطب اتحط في طريق الشخصية ولازم يعدي من فوقه.. ده العائق

المثال التاني .. ده تعقيد .. ازمة مش اجباري ان الشخصية تتعامل معاها.. اختيارية وبتعتمد على التضحيات والاختيارات..

..

نوضح اكتر..

..

العائق بيكون محطوط للشخصية من داخل الحبكة الرئيسية

البطل مثلا لاعب ملاكمة زى فيلم undisputed  الجزء الاول

وفريق العدو بتاعه قبل المواجهة الحاسمة حطوله سم في المياة وخسر بسبب كده

ده عائق

..

لكن التعقيد بيكون من الحبكة الفرعية او ال through line

بمعنى ..

لاعب ملاكمة.. أصيب في مواجهة سابقة وكان هيموت.. ورغم كده اختار انه يقوم ويواجه تاني

البطل ليه علاقة فرعية وهيا زوجته اللي دايما مساعداه لكن مع الوقت تعبت نفسيا خاصة بعد ما جوزها كان هيموت في المواجهة السابقة، وهيا لسه مخلفة ، وخايفة جوزها لو لعب وهوا لسه مصاب يموت ويسيبها هيا وابنها

فجت قبل المواجهة مباشرة وسابتله البيت ومشيت وقالتله لو رحت الماتش هتخسرني تماما انا وابنك

لكنه في المقابل لو ما راحش هيخسر بطولة العالم..

..

هنا ده تعقيد .. أهميته انه بيحط اختيارات وتضحيات وبيحط البطل بين خسارة وخسارة.. مش خسارة ومكسب، بيبين الجانب الإنساني جواه.. وبيعمل تحولات كبيرة في الشخصية خاصة لما التعقيد ده يكون في الذروة، التعقيد ده مثلا لو البطل ما راحش الماتش ورجع عشان عيلته رغم انه طول عمره مش مهتم بيهم، فده ممكن يوضحلك قوس تحولات الشخصية وانه اكتشف ان عيلته اهم من اى شيء، ولو راح هيحطك في تتابعات تاني.. 

..

دي أهمية التعقيد ان فيه عمق اكبر وبيلعب ع وتر الشخصية بالتوازي مع الحبكة، قيمته انه بيحتاج تضحيات فهوا بيقدملك ازمة في الحبكة وصراع داخلي كبير للشخصية، واحيانا ازمة في العلاقات..

..

البوست الجاى  هنتكلم عن عيوب كتابة التعقيد، وعن الحبكة الفرعية ونقط ضعف الشخصية..

..

شكرا ليكم