اللوج لاين للسيناريو

مشاكل كتابة السيناريو ٢

..

الحبكة الفرعية و ال through line

..

من فترة قابلني مصادفة فيديو ع اليوتيوب لمدرب سيناريو في ورشة بيتكلم عن الحبكة الفرعية بيقول: الحبكة الفرعية بتتعمل عشان لو انت هتكتب سيناريو مثلا ٩٠ صفحة وركزت فيه بس ع حبكة رئيسية واحدة هيبقى الموضوع ممل، فهيا بتتعمل عشان تمنع الملل وتزود الاحداث معاك.. 

الازمة دي بتقابلنا كمشاهدين في كتير جدا من الافلام والمسلسلات اللي بنشوفها.. اننا بنلاقي حبكات فرعية كتير جدا عبارة عن ملى ورق بس.. مجرد حشو ورق..

لكن ايه اهمية الحبكات الفرعية..

الحبكة الاساسية متعلقة ببطل ليه هدف وعدو او عائق ونتيجة..

الحبكة الفرعية متعلقة بالبطل واحتياجه وعلاقاته وقوس التحولات بتاعته

الحبكات الفرعية بيتعمل منها التيمة..

نِدي مثال..

مسلسل true detective

اتنين محققين .. بيحققوا ف قضية غامضة جدااا وبيتتبعوا خيوطها للنهاية. 

الخط الفرعي بتاع واحد منهم انه متجوز ومخلف بس علاقته مع مراته مع الوقت بتتوتر لأنه مهملها هيا وعياله، ومركز في شغله وهتتوتر اكتر لما تكتشف انه بيخونها لحد ما يتطلقوا.. وهوا بعدها هيكتشف ان عيلته اهم من الشغل وانه دمر حياته باهماله لعيلته.. هنا الحبكة اتعمل منها التيمة

ايه قيمة الحبكة الفرعية دي

قيمتها إنه اتعمل منها التيمة زى ما ذكرنا

قيمتها انه اتعمل منها صراع داخلي للشخصية

قيمتها انه اتعمل منهت عمق للحدوتة

قيمتها انه كان بيتعمل منها تعقيد للحبكة الرئيسية لدرجة انه هيقرر اصلا يسيب الشغل قبل ما يكمل حل القضية.. لحد ما يرجع في النهاية..

هنا التيمة اتعملت من الحبكة الفرعية.. 

وقوس الشخصية والعلاقات اتعمل من الحبكة الفرعية دي برضو.. قوس الشخصية يعني التحول الداخلي اللي بيحصل للشخصية ولمبادئها وقيمها ومفاهيمها ومشاعرها.. هوا كان فاكر ان شغله اهم شيء وعيلته مش بنفس الاهمية لحد ما يكتشف العكس في النهاية..

..

طيب هل الحبكة الفرعية ليها بنية؟! هل بتخضع لنفس بنية الحبكة الرئيسية؟! هل بيتعمل لها beat sheat 

مدى تأثيرها ع الحبكة الرئيسية

هل ممكن نعمل اكتر من تيمة بأكتر من حبكة فرعية؟

ازاى ندمج الحبكات دي مع بعض بدون تطويل أو حشو؟!

ايه الفرق بين الحبكة الفرعية و ال through line

هل الحبكة الفرعية بتحتاج برضو عدو فيها او ازمات وتعقيدات وذروة؟!

ازاى نبني الحبكة الفرعية من خلال بنية الشخصية واحتياجها؟!

..

اسئلة كتيرة وعلم واسع جداا.. لكن في مصر بنستسهل فعلا

ونادرا ما بتلاقي حد في مصر في الورش مثلا بيدي للحبكات الفرعية حقها.. مع انها تستحق ورشة لوحدها.. انا ما اتعلمتش كتابة سيناريو الا بعد ما عرفت قيمة الحبكات الفرعية..

..