اللوج لاين للسيناريو

مشاكل كتابة السيناريو

..

" التوهان والتشتت"

..

فئة كبيرة جدا من كتاب السيناريو في اعمالهم الطويلة الاولى بيبدأوا يكتبوا وفجأة بعد ما ينجزوا مجموعة مشاهد بيبدأوا يتوهوا أو يتشتتوا أو يوقفوا في النص ما يعرفوش يكملوا.. ايه السبب؟!

.

السبب إن كتابة السيناريو الطويل تختلف عن كتابة الشِعر مثلا اللي بتبدأ كتابة وتسيب الالهام يساعدك.. وتختلف عن السيناريو القصير اللي ممكن يكون حالة بسيطة او موقف بسيط..

لكن بناء السيناريو الطويل زى بناء اى شيء في الدنيا بيحتاج تأسيس م البداية، وإلا كل شيء هيتهد عليك من الاول..

قبل ما تبدأ تكتب حرف في السيناريو.. 

لازم تعرف كل شيء عن اللي هتكتبه.. هنقول نقط ونشرحها بعدين بالتفصيل

لازم تحدد فكرتك.. وتكتب اللوج لاين بتاع الفيلم.. اللوج لاين ده بتكتب فيه البطل والحدث المحفز وهدف البطل والعائق أو العدو والنتيجة( وممكن ما تكتبش فيه النتيجة لما تكون هتوديه للمنتج لكن في البداية انت لازم تعرفها) كل ده ف سطرين مثلا 

فئة كبيرة من المؤلفين ف بدايتهم اول ما تسأله فيلمك بيحكي عن ايه، يقول لك مثلا باحكي عن انفجار بركاني بيصيب قرية مش عارف فين.. ويكون مبسوط انه عامل موضوع ضخم.ده غلط. خلي اجابتك الاولى لما انت تحاول تحدد فيلمك عن ايه، ان الاجابة تبدأ بالبطل

- فيلمك عن ايه؟

= ضابط شرطة بيتم زرعه كطالب جامعي عشان يقبض ع عصابة مخدرات من ادارة الجامعة لكن كذا وكذا..

( فيلم الباشا تلميذ)

لكن لو قلت .. فكرتي عن عصابة مخدرات في جامعة والشرطة بيحاولوا يقبضوا عليهم وكذا

انت ماشي غلط..

لأن اول كلمة بتكتبها هوا الشخص او الشيء اللي هتحكي الفيلم من وجهة نظره.

(عموما كل ده وقت المعالجة النهائية بيتكتب بالفصحى، لكن بينك وبين نفسك فكر باللي يريحك)

.

حاول وانت بتكتب فيلمك الاول تحدد بطل واحد عشان ما تتشتتش والفيلم يبهت منك ويتسطح والدنيا تعوم منك..

..

فأول نصيحة اعرف بطلك واعرف هدفه.. واعرف العائق اللي هيمنعه من هدفه.. واعرف النتيجة

أهم شيء لازم تعرف انت عاوز تطلع بإيه من الفيلم..

ما تكتبش حرف في السيناريو نفسه من غير ما تبقى حددت انت عاوز تنهي الفيلم بايه

..

أحيانا الفكرة بتبدأ في دماغ المؤلف بالتيمة.. التيمة دي هيا الفكرة الفلسفية اللي عاوز تطلعها بيها من الفيلم..

يعني مثلا ان الاهتمام بالعيلة أفضل واهم من أى شيء تاني

التيمة مش كلمة واحدة زى ما كنا عارفين

دي الحكمة اللي عاوز تطلع بيها

ممكن بعد ما تحدد التيمة دي اللي هيا النهاية الفلسفية دي

ترجع من اول خالص.. وتحدد كل اللي قلنا عليه.. بس التيمة محتاجة شرح اكتر واعمق

..

لكن اول نقطة انك تحدد الحاجات اللي قلنا عليها فوق دي بالتفصيل.. والبوست الجاى نكمل 

..